28‏/08‏/2012

النص الكامل لاعترافات ميشال سماحة: اللواء مملوك زودني عبوات لتفجير لبنان

 
نشرت جريدة "الجمهورية" اللبنانية, في عددها الصادر أمس, المحضر الرسمي للتحقيقات مع الوزير والنائب السابق ميشال سماحة الموقوف بتهمة التحضير لعمليات إرهابية في شمال لبنان بهدف إحداث فتنة طائفية ومذهبية, تنفيذاً لأوامر النظام السوري وتحديداً مدير مكتب الأمن الوطني السوري اللواء علي مملوك.
وإذا كانت "الجمهورية" عللت سبب نشرها المحضر الرسمي بكل وقائعه وتفاصيله بأنه تأكيد لرسالتها في كشف الحقائق إجلالاً لدماء الشهداء الذين سقطوا في التفجيرات والاغتيالات, وليس لتسجيل سبق صحافي, فإن "السياسة" تعيد نشر المحضر الرسمي للغاية نفسها التي أكدتها الزميلة "الجمهورية", فضلاً عن تأكيد دورها المتقدم منذ سنوات طويلة في فضح مخططات النظام السوري الإرهابية في لبنان, والتي تعدت مفاعيلها الحدود اللبنانية لتطال المنطقة بكاملها.
وتوضح "السياسة" أنها عمدت إلى اجتزاء العبارات البذيئة أو التي تنطوي على شتائم الواردة على لسان ميشال سماحة والمخبر, اضافة إلى الحوارات الهامشية التي لاتفيد الموضوع وليس لها أي أهمية على الإطلاق.
وتؤكد "السياسة" تبعاً لخبرتها الطويلة في التعاطي مع الملف اللبناني أن كل ماكشفته التحقيقات مع سماحة, ليست سوى رأس جبل الجليد بالنسبة لمخططات النظام السوري الجهنمية في لبنان, منذ سنوات طويلة.
الاجتماع الأول
سماحة: بيوصلوها مطرح اللي منقلن من دون ما يعرفو شي
في الساعة التاسعة من يوم الجمعة الموافق للعشرين من شهر يوليو عام الفين واثني عشر, نحن النقيب رقم 91222 والملازم اول رقم 91382 من ضباط شعبة المعلومات من المديرية العامة لقوى الامن الداخلي ومرتدين اللباس المدني نثبت انه وفي اواسط شهر يوليو من عام 2012, حضر احد الاشخاص (ميلاد كفوري) الى مركز الشعبة وصرح ان لديه معلومات امنية على قدر عال من الخطورة يرغب بالادلاء بها, وباستيضاحه من قبل رئيس الشعبة صرح وبانه ومنذ مدة اتصل به الوزير والنائب السابق ميشال سماحة كونه على علاقة معرفة به وطلب مقابلته في اقرب وقت ممكن في منزل سماحة في محلة الجوار (بالمتن الشمالي شرق بيروت), مضيفا انه توجه الى منزل سماحة والتقى به حيث اخبره الاخير بان اللواء (علي) مملوك (مدير مكتب الامن الوطني السوري) يهديه السلام ويريد منه خدمة, وباستيضاح الامر اعلمه سماحة بان المطلوب تنفيذ عمليات تفجير واغتيالات في منطقة عكار (شمال لبنان) وبان اللواء مملوك على استعداد لتامين المتطلبات اللوجستية والمادية اللازمة للتنفيذ, عندها اعلمه الشخص بانه سيفكر في الموضوع وقرر التوجه الى شعبة المعلومات والادلاء بما لديه, وعليه سطرت.
- وبتاريخ 20/7/2012 تم اعلام النائب العام لدى محكمة التمييز القاضي سعيد ميرزا بالموضوع تفصيليا فاشار باعتبار المذكور مخبرا سريا في هذه القضية وتنظيم كتاب خطي بذلك.
- بموجب كتابنا رقم 155/205 الموجه الى النائب العام لدى محكمة التمييز تمت الموافقة على اعتبار الشخص المذكور مخبرا سريا في هذه القضية اعتبارا من تاريخ 21/7/2012.
- حضر المخبر السري وصرح بانه سيجتمع بسماحة صباح السبت في 21/7/2012 في منزل الاخير الكائن في محلة الاشرفية ¯ ساسين. وبناء عليه تم تجهيز المخبر السري باجهزة تصوير وتسجيل سرية في جسمه بغية توثيق اللقاء بين سماحة والمخبر السري بالصوت والصورة. وبعد حصول اللقاء حضر المخبر السري حيث تم نزع جهاز التسجيل والتصوير من جسمه وتفريغ محتوياته مع الاشارة الى حصول لقاءين اخرين بين ميشال سماحة والمخبر السري بتاريخي 1/8/2012 و7/8/2012 وعليه سطرت.
وقائع الاجتماعات
- في ما يلي الوقائع (تفريغ خطي) للاجتماعات المذكورة اعلاه بين ميشال سماحة والمخبر السري وجميعها موثقة بالصوت والصورة بعد تجهيز المخبر السري بالمعدات التقنية اللازمة.
صباح تاريخ 21/7/2012 الاشرفية - بيروت:
بعد حديث جانبي عام بين سماحة والمخبر تطرق قليلا الى انفجار مبنى الامن القومي في دمشق الذي قتل فيه 4 من كبار اركان النظام السوري, دار بينهما ما يلي:
مخبر: طيب حبيب, بدي منك شغلي, طيب اول شي بدي الك شغلي, اجانب بعكار ما في كسَكن واقامة, في سيارات ديبلوماسية ولوحات ديبلوماسية سيارات اجار عم يتحركو بكثافة بالمنطقة نص ساعة, تلات رباع الساعة, ما بيقفرا الا حواجز الجيش المفروض متل عند اصحابنا كل واحد بيمر بتسجل لانو هيدي منطقة عسكرية صح, وهيدا شي مش عم بصير بحسب علمي, نتبه عحد علمي.
مخبر: بدي ارجع كرر عليك نحنا بدنا نكفي بالموضوع ولا صاحبنا شو توجيهاتو بدو يكفي?
سماحة: بدو يكفي وبدو يعرف واذا فينا نعمل عمليات بدو يعمل.
مخبر: اوكي طيب, انا يعني, انت بتعرف, انا هي الشغلة الكن عندي مين يعملها بس تحت سلطتي. انا بدي صاحبنا يعرف انو لازم يحميلي عيلتي اذا في حال لا سمح الله صار لانو بالاخير مش رح نقضي عمرنا, يعني بالاخر بروح بالمغليطة عرفت عليي كيف.
سماحة: في اربعة اشخاص.
مخبر: بس هاو البيعرفو بالعملية بس?
سماحة: الكبير وهوي وانا وانت.
مخبر: بس هاو البيعرفو بالعملية, ما في غيري مكلف?
سماحة: وبلبنان ما في حدا بيعرف وقت في بضاعة بيوصلوها مطرح اللي منقلن, منقلوا يوصلا من دون ما يعرفو لمين ولا كيف ولا وين ولا شو بدو يصير ولا...
مخبر: بس هوي بدو يحددلي الاهداف لسبب.. جماعتي ما بيقدرو يحددو اهداف عشوائية, يعني بدو يحدد اهداف محددة ليرصدو وينفذوا ساعة لبيكونو مرتايحن. هني تلات اشخاص, المتطلبات هيي هاي: (قام المخبر بتسليم مغلف لسماحة) بعد اجتماعات متكررة انا وياهن توصلو انو هني بحاجة لها لغراض هاو.
سماحة: حقيبة او مستوعب كرتونة شو يعني.
مخبر: يعني انتبه انا قعدت انا وياهن. هني بيعبوهن. رح قلك شو قلتلن بدك الصراحة هني ضد 14 اذار حكما, واحد منن امو مجوزة من فلسطيني وانت بتعرف راسي. انا بالاسامي ما بعطي اسامي.
سماحة: لا ما بدي اسامي ما شغلتي.
مخبر: انا قالولي سجل سجلت, كتوب كتبت, قالولي انت خينا وحبيبنا اذا كانو الجماعة فهمانين بالموضوع لازم يعرفو نحنا شو طالبين.
مخبر: هلق في قسم اللي سالت عنو بيتامن من هون, مثلا دراجة مسروقة, سيارة مسروقة, هني بامنوها مع وراق مزورة.
سماحة: بالاهداف.
مخبر: هلق حسب الاهداف البدنا ياها بيختارو اي مواد لازم, يعني هيدي في الحالات كلا. هلق بالاستثنائيات بيختارو اي وحدي بدن يشتغلو فيها.
سماحة: هاي لكل وحدي.
مخبر: بالضبط لكل وحدي.
سماحة: لكل عملية.
مخبر: بالضبط نحنا عم نحكي عوحدي بالكميات.
سماحة: بالاهداف.
مخبر: بالاهداف بدنا نحدد.
مخبر: هني قالولي, قلتلن طبيعة العملية, يمكن اذا لقينا في مكان في اجانب بدنا نضطر ننزل المكان عروسن, واذا لقينا في اماكن بس نعمل رعب بالمنطقة او تحضيرا لفتنة بين طايفة وطايفة بدنا ننقي اهداف تاثر عالشارع. بيقلي التاني هاي حالات نحنا مش عايشين بالصومال نحنا عايشين بلبنان نحنا عايشين بيناتن مخابرات الجيش موجودة, المعلومات موجودة, امن الدولة مخابرات اجنبية وحزبو كمال الخير وجهاد الصمد موجودة ما فينا الا ما نحدد الهدف تنقدر نشتغل برياحتنا وننجح.
سماحة: طبيعة الاهداف اولا انا ما بدي تطلع ردة الفعل منوا عالعلوية. طبيعة الاهداف اماكن تواجد مقاتلين سوريين هني بيعرفوها اكثر مني.
مخبر: مظبوط قالولي عنها موجودة.
سماحة: القيادات اللبنانية اللي عم تتعاطى معن.
مخبر: يعني العم تدعمن.
سماحة: اللي عم تدعمن وتتعاطى معن واذا بينعمل شي مغلغل يعني اثناء وجود هوديك معن بمكان تواجدن بينعمل شي هني يرصدن, فيهم يعرفو فيهن يعرفو اذا بيقدروا او ما بيقدروا القيادات اللبنانية اللي داعمتن في اماكن تواجدها الاماكن اللي ما فيها جيش لبناني وهني اخدين راحتن فيها, تفجيرين تلاتة فيها مما يخلق الرعب ويزيد الحذر بس هني بدن يعملو حسابن, انو بس تعملا لهاي ما فيك ترجع تعملا بذات المحل لانو بيصيرو حذرين, بتنعمل مرة.
مخبر: بدو يتحدد هدف يكون في زبدة.
سماحة: هيدي هيي هلق بيشوفوا, هوي اذا عندن اهداف محددة كمان منجيبها. تكاليفها?
مخبر: هلق شوف بالنسبة للتكاليف, قبل التكاليف بدي الك شغلة, بجديتها للعملية نحنا بيهمنا اذا واحد لا سمح الله تعبشو في, نقدر نغطي عيلتو ماديا لانو هيدا الاتفاق اللي صار انا وياهن, وما بيعترف عشي لو بدو ياكل قتل بس عيلتو مامنة بالحد الادنى. لما بدو يبلش بالتنفيذ يكون معو مش حيعودو يترددو عاساس بيتاجروا بالخضرا بدن يروحو عالسوق والى اخره. كانو تاجر خضرة عم بيروح. بالنسبة لالي يعني انت لازم تعرف, انتا بهالحياة كلا سوا انا لو ما هني عم يطلبو انا ما بعمل هيك شغلات, هلق ليش صار هالاختيار عليي بتحور وبتدور براسي ما عم لاقي جواب.
سماحة: الثقة, الثقة, الثقة, الثقة, لما بتقول ما بقدر يعني ما تقدر. في حرص عليك وحرص من خلالك عالناس البدا تعمل, انو يروحو ويعملو ويضحو لذلك وقع الخيار والك القرار, يعني بتقول ايه ممتاز بتقول لا. متفهمين تنين هاي شغلة الامان فيها وامن الناس والثقة هيي الاساس مش انو والله عنا شبكة هيك وروحو شغلوها, وانا ما بعمري عملت قصص من هالنوع.
مخبر: رح قلك شغلة, انا بريدك تكون, الجماعة يعني صاحبنا هوي بيعرف قيمة هالشغل انا بالنسبة لالي جماعتي لازم ريحن انت بتعرف راسي بهالموضوع كنت اتدين لادفع لجماعتي, انت برايك اديش لازم تكون الدفعة الاولى مع الاتفاق اذا هالاشيا ممكن تتامن.
سماحة: بتتامن بتتامن.
مخبر: وبنفس الوقت نحنا بحاجة لشغلتين مش مذكورين, انا بحاجة لمسدسين كاتم للصوت
سماحة: اوكي.
مخبر: ما نذكروا بالورقة, ما بدن بندقيات, في حال نزركو برَوحو الي شافن بدون صوت بدون شي تيقدرو يغادرو المنطقة اللي هني فيها من دون ما حدا يشوف, هلق التقدير المادي
سماحة: يا خيي, قلي هيدي الشغلة او نكور, بدي هلقد, هلقد بدو ينضاف اهداف, هيدا طبيعي.
مخبر: اذا تامن 200 الف (دولار) بيعطي كل واحد منن مرتو 50 الف وبيتسهلوا, بدن يامنو السيارة والموتسكيل. انا تركني عجنب. هلق شي بيرجع صاحبنا يقدر بدي ابعتلو هلقد شي, بيرجعلو بدو يزيد او ينقص لكن اذا باكثر الظروف الصعبة, وحضرتك بتعرف كنت عم ساعد رغم انن كانوا منتشرين حتى بالحمامات تبع العالم شعبة المعلومات وجماعة الحريري وهيديك انت بتعرف زبلني وكبني. وانا بالاخير تقديرك وتقديرن يعرفو, بس انا بدي اترك الموضوع لاختيارن هني لالن, قلت لانا كون مرتاح مع تامين الغراض. انا بيهمني الغراض, الغراض مش موجودين او ما وصلو?. وتحديد الاهداف, الاهداف فهمتا بشكل عام يمكن يطلع هدف غير كليا عن الي عم نحكي شو بيعرفني, شو بعمل, بدي اعمل, ما بعرف, كتير عم بطلب?
سماحة: ما عندي توقع لانو ما بعرف, ما بتوقع ما بحط توقع انت بتعرف.
مخبر: انا حسبت بس بدي بلش مع انو في ثقة, بعطي باكيه 15 الف دولار خلص لمرتك, بفهم حالي اني شبعتن من اول الطريق ما بيفكروني عم كحلح, خاصة عمليات من هالنوع بدو يكون في ثقة والحمدالله انا عندي ثقة فيهن مليون بالمية, اذا تختخ بالحبس وقرطو قتل ولا ممكن يحكي لان عندو اخواتو برا, بس عطيتن وعد انو اذا صار شي لا سمح الله العيلة انا بامنها. هلق شو تعليقك ما بعرف.
سماحة: انا طالع وبرجع وبتبلش.
مخبر: بدنا نتفق هون انت قلتلي ممكن يتامن بضاعة محليا نشالله يكون.
سماحة: بيقولو للحزب بيحطن بالمطرح الفلاني وخلص منشيلن, ما بيعرفو لا مين ولا وين ولا بيعرفو شي. الجو هون كيف?
مخبر: والله الجو هون يطول عمرك اجاني انو نجيب مغير بحركتو بطريقة تعاطيه بالجلسات, متل كانو عم يلبط, واحتمال اميركا والسعوديين واعدينو بالجلسات, مين بعد عندو بشار? كل الحلقة راحت..
سماحة: ما بعرف في تغير بالقيادة القطرية (بحزب البعث في سورية). وقت تغير مجموعة قيادات بعد الدستور بطل الحزب القائد, هيدي حلقة جديدة يعني بختيار رئيس مكتب الامن القومي في الحزب, وهاو مجموعة حزبية امنية مش مجموعة الدولة بس مكتب الامن القومي بالدولة ما حدا بيعرفو, مش هاو. هاو عالاقل 4 منن مع التغيرات الجاية بيبطلو. حتى اصف بطل رئيس جهاز وبطل نائب رئيس الاركان, هوي نايب ووزير الدفاع حافظ عليه لانو صهرو بس منو بالحلقة, ليست له الامرة وليست له يعني اوقات كان يدخل حالو. انا صاحبي بشوفو دايما وبعرف وين بيشكي القيادات الحقيقية بشار صرلو 17 شهر بيشتغل ساعات نهارو كامل بيعرف مين بيامر مين ومين خرج وعامل تركيبتو.
مخبر: تركيبتو ما حدا بيعرفا فعليا, شو موقع علي غندور وشو بيدير. عل الجزيرة ذكرو انو بالحلقة الضيقة بعد في علي مملوك وكم اسم سمعت.
سماحة: هوي علي متل ما شايفو كيف عايش ووين قاعد.
مخبر: طول عمرك انا لازم اطلع?
سماحة: اتفقنا انت ما بتبين.
مخبر: يقبرني ربك.
سماحة: انت ما تبين.
مخبر: ووافق هوي, اتفقنا على الحكيناه. انا زلمي ستريكت كيف بدي قلك ياها, يعني الجماعة بدي يحافظو عليي, انتي مش موجود, انتي لا هون ولا عندن باديش ممكن تجاوبني?
سماحة: نص جمعة الجاي.
مخبر: شو بقلن للشباب نزلو عسوق الخضرا, انا رايي قلن نزلو عالسوق.
سماحة: ويبلشو
مخبر: يبلشو يستقصو عل الخفيف مطرح ما بيعرفو الاهداف القلتيلي عنن نقدر نتصيدن ولا لا, هلق الامور هون شو?
سماحة: هون بدون يجروك على مشكل, مش رح ننجر, كلام السيد واضح جو المنطقة جو حرب.
(هنا دار حديث عن اوضاع المنطقة)
مخبر: انا ماشي.
سماحة: انا بتصل, ممكن, ويمكن غلاديس (سكرتيرة سماحة) تتصل فيك وتقلك الساعة الفلانية بالبيت.

الاجتماع الثاني
سماحة: فيك تروح نواب واذا مفتي عكار موجود يروحوه
الاجتماع الثاني في 1/8/2012 الساعة التاسعة والنصف صباحا. المكان بلدة الجوار داخل منزل سماحة:
بعد الترحيب والتأهيل دار مايلي:
مخبر: كيف الاوضاع?
سماحة: منيح بيسلمو عليك.
مخبر: والمركز الجديد تبع صاحبنا. (علي مملوك بعد توليه رئاسة المكتب الوطني خلفا لهشام اختيار الذي قتل في تفجير مبنى الامن القومي بدمشق)
سماحة: ممتاز
مخبر: غير هيداك, يعني احسن من هيداك.
سماحة: غير هيداك. هلق صفا كل الاجهزة بتصب عندو
مخبر: اي اوكيه
سماحة: كل الاجهزة عندو والعلاقة مع الرئيس بالموضوع الامني هوي ومكاتبو بالقصر.
مخبر: مش متل ما كان هيداك بختيار مختيار
سماحة: لا هيداك كان الحزب الواحد هيدا نعَمَل قانون جديد, نوع من وزارة امن
مخبر: وزارة امنية?
سماحة: مش وزارة يعني ما بدن يسموها. مكتب امن قومي على الطريقة الاوروبية بس مضمونها مش هيك. مضمونها اول مبارح جمعن الرئيس لاول مرة عطا التوجيهات تبعن كلن, وفق نص ال¯... وهلق عم ينقل بس الصلاحية والامر الو.
مخبر: الصلاحية والامرة لالو?
سماحة: لا منيحة منيحة
مخبر: انا توقعت بدا تتغير بعض الامور انو بالتغيير يللي صار
سماحة: انو رستم يطير يعني
مخبر: لا انو منشان صاحبي, صاحبنا, انو ما يكون بالزخم اللي كان فيه.
سماحة: مين علي?
مخبر: ايه
سماحة: لا بالعكس اكتر صار
مخبر: اكتر, هيدا فكري انا
سماحة: لا اكتر بكتير صار, هاي ما الها علاقة. يلي كان قبل, صالون امني دون صلاحيات تابع للحزب وبيعطي راي اسستشاري ولا يأمر الاجهزة, يعني ما عندو امرة عشي, هلق لا, اخذت دروس من كل المرحلة السابقة تركز وتعمل قانون صرلن ست اشهر بيشتغلو عليه والرئيس البضاعة ما بعرف ايمتا بتوصل, بيخبروني.
مخبر: يعني ماشيين
سماحة: ماشيين, بس في تعديل بسيط هلق المبلغ نزلو ل¯170 (الف دولار)
مخبر: بس حضرتك قلتلن انا مش حاسب حالي.
سماحة: ايه ايه مش حاسب حالك وهو الرئيس وعلي بيقولي في الو شي لوحدو, الو شي لوحدو, ما الو علاقة.
مخبر: انت عارف, انا زلمي عارف انا
سماحة: بتعرف شو اوضاعن
مخبر: خلص
سماحة: ما تلاقيني الا انا جايب
مخبر: خلص اوكيه الي بتشوفو انت.
سماحة: بلشو
مخبر: خلص انا يطول عمرك رح قلك, انا مش نايم وانا عم بشتغل وجماعتي عم يشتغلو.
سماحة: يعني حتى المصريات (الاموال) ما قبل انا احملن, عالطريق بين اليوم بالليل وبكرا بعد الضهر بيكونو هون.
مخبر: اوكي
سماحة: والبضاعة بتكون ما حدن بيعرف وين عم نسلمن
مخبر: انا البضاعة يطول عمرك بالنسبة للبضاعة بس بدي قلك كلمة. حضرتك بتقلي البضاعة موجودة بالمحل الفلاني تا ما قول بدي البضاعة بالمحل الفلاني, يحددولي هني وين بدن يحطوها بيقولولي يحييه موجودة نشالله بسيارة كسر ما فرقانة معي, بس ما يكون في مدة طويلة تا اقدر اوصال عليهم بس.
سماحة: البضاعة بقولولي بعد ساعة ساعتين بتكون بين ايديك
مخبر: طيب بس تذكرت تقلن عن المسدسين
سماحة: اكيد قلتلن مسدسين كاتمين للصوت مع مع مع...
مخبر: طيب انا حددت, حددنا, صرنا تقريبا جاهزين اكيد بعدين رح اعطيك ياهن. عنا قرية السنورة, عنا عمار البيكات, عنا الهيشة والمقيلبة, هاو تنيناتن بمنطقة وادي خالد. عنا الكنيسة وعنا كفرتون نحنا مركزين هلق هونيك لانو المينو المطلوب, المجموعة المطلوب استهدافها تتحرك بهيديك المنطقة صارت تقريبا بدك تقول مرصودة /99/ بالمية لكن عم بضطر ابعتن بالنهار لبعد الضهر يطلعو بعد الضهر عم اخيفهن بالنهار عم نزلُن متل ما كنت حاكيك.
سماحة: شو بيكونو عم يعملو
مخبر: اياهني منن?
سماحة: المرصودين
مخبر: بيهربو مسلحين وبيشترو ذخيرة من السوق الطرابلسي ومن السوق العكاري. هيدي موجودة, فلوس موجودة, في عملة صعبة, في افطارات عم بتصير عم يحضرها نواب هلق هون ما بعرف حضرتك حكيتن عن الاهداف. حكيت مع علي عن الاهداف بيحدد هوي الاهداف ولا
سماحة: عندن افطارات, في نواب فيك تروح نواب, فيك تروح الضاهر, خيو, حدا من القيادات السياسية تبع الجيش الحر, السوريين, تجمع سوريين فيه مسلحين في مكان ما, مخزن ذخيرة في مكان ما, الطرقات يلي بيمرقوا عليها, ياكلوها ضربتين تلاتة بشكل يتضعضعوا وما يسترجو يمرقو عالطرقات. هيدي اهداف.
مخبر: بالنسبة للطوايف
سماحة: ما بدن علوية
مخبر: ما بدن, طيب اذا كان مفتي عكار موجود بافطار من الافطارات شو منعمل لان يعتقد انو رح يحضر افطار من هلافطارات هيدي.
سماحة: اذا الموجودين تقال يروحوا.
مخبر: اوكي
سماحة: لا بدنا يعني هاي لا بدنا نقلو ما تروح, ما بدي يعرف شي
مخبر: ايه
سماحة: عم تحكي عن مفتي العلويين
مخبر: لا عم احكي عن
سماحة: عن مفتي السنة
مخبر: مفتي السنة
سماحة: ايه شو عليه
مخبر: تبع عكار?
سماحة: شو عليه?
مخبر: هيدا احتمال يحضر هيدا الاسبوع. هيدا يلي عرفتو انا بيهمني نكون عم نشتغل صح.
سماحة: مبارح لو قادرين يطالوه بيطالوه , لاحمد حسون, مبارح خاطفين من الجامع بحلب خيو للمغني وهو شيخ
(هنا دار حديث عن الاوضاع في سورية)
مخبر: هلق نحنا بيهمني انا, يطول عمرك, شغلنا ما يكون حدا عارف في نهائيا.
سماحة: بس
مخبر: وهني ما يكونو مكلفين حدن تاني
سماحة: ما حدا بيعرف. ما حدا بيعرف. ما حدا ما حدا ما حدا ولا حتى لن تؤخذ البضاعة والمال من جهاز. ما حدا بيعرف انو في هيك. في كذا في كذا. امن الشباب وعيلن مكفولين, تكفل فيهم, وامنك انت, وتكفل اسمك مش وارد ما حدا بيعرفو.
مخبر: بس انا قلتلك, انا بالنسبة لالي انا بتركا عليه وهوي يقدر
سماحة: انا بعرف القصة وانا بعرف كيف بيقدر.
مخبر: ايه خلص بس
سماحة: وهلق صارت اكتر لانو هيي اجت بمرحلة الانتقال من وضع لوضع بعرف انا كيف رح يتصرف هو ويياه.
مخبر: خلص انا بيهمني هيك, بس اكيد بدي رتب هوديك تريح راسي, هلق انا اوكيه, نو بروبلم.
سماحة: بتبلش ترتب هوديك وانت مرتاح
مخبر: ايه خلص بس
سماحة: و... لجيب تلفوناتي
مخبر: يعني راضي عليي صاحبنا
سماحة: (ووه صفرة من الفم) بس يبلش التنفيذ بدك تشوف, انا بعرفن, انا بعرفن كيف بتتطور الامور وكيف بيصير رد الفعل بس تصير القصة.
مخبر: يا الله يا كريم
سماحة: الوزير كيفوي
مخبر: ماشي
سماحة: صحتو
مخبر: منيح
سماحة: يا الله عالخطوط
مخبر: شو ما في خطوط, حتى بلبنان ليش في خطوط بدي اعرف عشو دعمتن هودي
مكالمة هاتفية لسماحة: صباح الخير كيفك منيح ماشي الحال, فيي احكي معو, شكرا
الو قطع... كيفنا اليوم, صباحك منيح, ماشي الحال, منشكر الله, شو الشيخ احمد, ايه, شو, ايه, شغل سلطة, بتخلص من واحد بيجيك التاني.
اخوات شرمو.. من الميقاتي للرئيس لتركيبات بالجيش
اي اي هونيك منيح, اي انا منيح, انا نسيت اخذ منك لائحة الادوية وين صارت, ايه اه, اوكي اوكي, ايه ايه ايه لانو, ايه اوكي اوكي يالله.
سماحة: قلي بين اليوم وبكرا من اليوم الليلة وبكرا
مخبر: والباقيين
سماحة: شو الباقيين?
مخبر: المواد
سماحة: كلو كلو
مخبر: اه كلو
سماحة: كلو, بتستلم كل شي, سوا كل شي سوا.
مخبر: يعني رح حضر حالي على التنفيذ.
سماحة: ما في مشكل
مخبر: اعتبارا من اليوم لانو بدي
سماحة: حضر حالك
مخبر: لا بدي اشتغل, اهم شي بدي امن السيارة, بدي قلن يامنو السيارة والموتوسيكل.
سماحة: بلش حضر حالك من اليوم, نحنا منشوف بعضنا يا بكرا بعد الضهر يا الجمعة الصبح ببيروت بالبيت.
مخبر: باقي هلق, في سفر?
سماحة: لا لا انا قبل ما تستلم كل شي وتباشر ما رح اتحرك, رح يصرلي وقت. انا التنين (الاثنين) بدي شوف الرئيس وبدي عزي ابراهيم صافي قتلولو ابنو
مخبر: قتلولو ابنو, ظابط يعني?
سماحة: مش ظابط, طيرجي راجع بالليل عطريق المطار عملولو كمين بيكون في حدن بالمطار عاطي خبر.
(هنا دار حديث عن الاسد واوضاع سورية)
مخبر: هون (بلبنان) هون شو
سماحة: هون اخوات شر... (كلمة بذيئة نتحفظ علة نشرها)
مخبر: هون, هون هالاخوات ...
سماحة: اخوات شر.... من الميقاتي (رئيس الحكومة نجيب ميقاتي) للرئيس (رئيس الجمهورية ميشال سليمان) لتركيبات بالجيش يعني التهريب العم بيصير مش محمي?
مخبر: طبعا محمي, محمي وغض نظر كمان.
سماحة: محمي وغض نظر من ضباط عم تقبض.
مخبر: بدي اسالك انو الحزب (حزب الله) راضي عن هالتركيبة هاي كلها, معقولي يتركها هيك
سماحة: يا حبيبي الحزب رؤيته كبيرة, بيمتص امور داخلية بس ما بيخليهم يوقعو. هوي بالاسم في استحقاقات ضخمة, في امكانية حروب كبيرة, في امكانية قصص كتير كبيرة شايفها, هلق في حرب كبيرة صار قصة كبيرة, بيلعن ابوهن كلن عالطريق كلن كلن.
مخبر: اذا تطورت الامور هونيك
سماحة: بالمنطقة مش بس هونيك
مخبر: بالمنطقة
سماحة: الغرب وتركيا عم ينزركوا من خسارة بسورية لخسارة, مزبوط عم تاكلها سورية بس ما عم يقدروا يحققو شي زايد, هني اعتبروا انو بيعملو مخطط بشكل دقيق, ضربة الاربعاء عظيم عملتوها وهجمتو عالشام, لا الضربة اثرت بالنظام, عملت اثر بسيكولوجي. كنتو بدكن تستعملو هيدا الاثر البسيكولوجي بالاعلام ليصير في فوضى بالشام. انو معتبرين انتو بينزلو هاو بيفوتو بالشوارع ويقوموا اهل الشام. صار عكسها تمام, فظيعين الناس, نضفو الشام, وتنضفت حوالي الشام, تعفر تعفير حوالي الشام وعم بيبلشو يفوتو اكتر عتفاصيل الريف. رحتو تعملو حلب عظيم. حلب, ريف حلب عم يستعمل فيه الطيران ووين في تجمع بتطلع بتضربو. تجمعات بقلب حلب عم تنضرب بالهيليكوبتر والجيش عم ي.... بعد يومين كل ما يعلا صوتن بالاعلام كل ما بتكون خسائرن فادحة عالارض. بالنتيجة شو? بدك تكون جاهز لايا شي انتي والعراق وايران ولبنان لكل شي.
مخبر: طيب هلق, يطول عمركن بس سؤال انت بتقلي التسليم وين بدو يكون?
سماحة: انا بتصل فيك بتجي لعندي بعطيك التفاصيل بتروح دغري.
مخبر: بروح دغري. بدو يكون في شخص معني ولا
سماحة: ما في حدا
مخبر: ما في حدا احسن
سماحة: ما حدن بيشوف ولا حدن بيعرف
مخبر: اوكي ماشي
سماحة: يعني بتكون التعليمات بتروح بتحط الساعة الفلانية هالغرض الي هوي المعدات, المال بيوصل لعندي ما في مشكل.
مخبر: اوكي
سماحة: بتجي بتستلم الغرض وبتروح بتستلم البضاعة
مخبر: بس هلق انتي حكيتو. انو هاو دفعات بمرقولنا دفعات مش هيك, لان تاعرف كيف بدي اتصرف بس هيدي ياها مافي مشكل ما منقدر نبلش هلق
سماحة: ايه ايه
مخبر: بشكل عام انت مرتاح للوضع هيدا اهم شي
سماحة: ايماءة (بالايجاب)
مخبر: طيب يطول عمر انا اتسهل
سماحة: ايه
مخبر: يعني عملية 72 ساعة. انا رح ابدي حضر مشان السيارة والموتسيكل ونركز اكثر تنشوف اول وحدي وين بدنا نعمل. تكون انسب وتكون شوي فيها زبدة يعني ضربة كبيرة, يعني يروح فيها ناس كتير. رح احكي مع جماعتي بهالطريقة هيدي وعلى ضوئها متل ما الله بيريد شو بدنا نعمل (ضحك) شو بدنا نعمل طلعت القرعة علينا تقبلناها.
سماحة: ايه يعني قرعة ثقة بال¯... ثقة بالشخص بعقلو بسريتو بقدرتو بحسن ادارتو, بخبرتو, بخبرتو بالناس وتقدير الظروف.
مخبر: حبيب قلبي دير بالك لحالك وانا رح انتظر اتصال.
الاجتماع الثالث
سماحة يسلم الأموال والمتفجرات في مرآب السيارات بمنزله
الزمان 7/8/2012 الساعة 20.40 داخل منزل سماحة في الأشرفية مكان حصول الاجتماع الأول.
مخبر: ما تواخذني أنا ضهري عم يوجعني كتير, أخذت حبة وأخذت إبرة هيدي بالفرمشية ونمت نمت وطفيت الخط ما قدرت إمشي, صدقني ما عدت قدرت امشي.
سماحة: هاو المصاري (سلم سماحة المخبر كيسا لونه أبيض)
مخبر: (قام بإخراج النقود) 170 ألف خلص. لازم عدن منشانك ولا خلص.
سماحة: خلص
مخبر: ما فيش بيني وبينك, انا بيهمني الأمور تمشي عخير.
سماحة: هلق بنزل أنا وياك بتنزِّل سيارتك
مخبر: إيه (قام بإعادة النقود إلى الكيس)
سماحة: 20 كيلو تنَينات
مخبر: 20 كيلو تنَينات
سماحة: تنين تنين, تنين تنين, وعندك يمكن 50 كيلو أو شي أو اكتر عشرينات أو تلاتينات
مخبر: كلو تي ان تي
سماحة: إيه
مخبر: كان لازم إيجي بغير سيارة بتعرف
سماحة: بشو جيت
مخبر: جايي بالسيارة الزغيرة أنا مش عارف إنو
سماحة: والمتممات بعدين, منشوف إذا في بعض المتممات أو شي أنا ما بفهم فيهم.
مخبر: المسدسات
سماحة: عم بجهزولك ياهن
مخبر: المتفجرات كلها جهزت يعني بيضل في الصواعق, الصواعق بعتولنا ياهن.
سماحة: الصواعق بعتلك ياهن
مخبر: بعتلي ياهن
سماحة: بس أطلع وارجع بدي ارجع جيب.
مخبر: أنا مبدئيا حضرت مرحلة التنفيذ بس أنا حضرتك في تحديد أنا رح قلك كلام يعني تقبلو مني. أنا صعوبة هيدا الموضوع إنت عارف شو هوي, أنا بيهمني إنو اللواء علي والرئيس فقط يكون معن خبر.
سماحة: مأمونة, ما حدا, ما حدا
مخبر: لأنو ديب زيتون استلم محلو بيكون عندو
سماحة: ما حدا, ما إلو علاقة ديب زيتون. عند علي القصة ما إلو علاقة لا ديب زيتون ولا حدا عند ديب, ما حدا إلو علاقة.
مخبر: خلص
سماحة: ما بيعرفو منين ولوين, في شخصين بيعرفو علي والرئيس
مخبر: بس?
سماحة: بس نحنا
مخبر: أنا اليوم كيف ممكن انحمي في حال حصل شي ما مأمن حمايتي وهيدا شي لازم أسألك ياه. أنا عندي عيله.
سماحة: مأمنة مية بالمية (نافر مايند) مية بالمية مية بالمية
مخبر: كيف الوضع فوق
سماحة: (إيماءة استحسان وارتياح)
(هنا دار حديث عن الوضع الصحي لسماحة)
مخبر: هلق, يطول عمرك, خلينا بالأهداف, في شي تعديل بالأهداف.
سماحة: لا أبدا كل ما يعرقل النظام والقيادة وأمن التنقل وإمكانية ضرب الأسلحة والذخيرة والتجمعات, المقاتلين, مفتوحة, مين بروح بالدرب (إيماءة عدم مبالاة باليد)
مخبر: ونواب المنطقة
سماحة: كمان كمان, قبلنا
مخبر: أنا قلتلك في شيوخ عم تحضر, شيوخ سنة.
سماحة: يصطفلو ينقبروا ما يعودوا يحضروا. اليوم هجموا بحلب عالأحياء المسيحية.
مخبر: بتعرفن
سماحة: صحابي كلن, تلفونات. ما في سوري. أخوات الشر... ليبيين توانسة, شيشان, أفغان.
مخبر: أف يا لطيف
سماحة: لهجات, لغات, أشكال, فات الجيش على عملية كبيرة بس إدامن عم ياخدوهم من البيوت
مخبر: وهون شو?
سماحة: هون أنا برايي بدا تفقش.
مخبر: بدا تفقش سياسيا بس?
سماحة: مين في يقول ما تفقش غير سياسياً
مخبر: ما حدن
سماحة: انا قلت بيساعو ب¯ ب¯
مخبر: معي الأودي.. أنا الأودي, بس أنا قلت إذا كل الغراض مش رح يساعو إذا كلن.
سماحة: بتاخد قهوة
مخبر: تا ما أخرك... بلا قهوة
سماحة: بلا قهوة
مخبر: طيب أنت أيمتا راجع طالع لتكملة الغراض.
سماحة: بأي وقت هلق بنشوف شو هني.
مخبر: بشوف شو في نواقص أصلا, بدي شوف جماعتي يشوفو هني, أنا ما بعرف إذا في قنابل مثلا, بعتولي قنابل, أنا طالب قنابل يدوية ضد الأفراد
سماحة: ما بعرف شو في إذا مش باعتين منجيبها مع الفرودي (المسدسات), شو بعد في نواقص رح تشوف. وفي صواعق
مخبر: أنا بيهمني صواعق وساعات التوقيت تبع التفجير.هودي أهم شي
سماحة: هني كانوا محضرين شغلة بدا الفان (الباص)
مخبر: فان شو, شو فان, شوي شوي, شو منقدر مناخد
سماحة: هيدا المكان الاساسي, منزل منو بيتنزل وبيتحضر...
مخبر: آه اوكي
سماحة: ما بيعرفوا شي
مخبر: من عند الرئيس مباشرة
سماحة: إيه
مخبر: إيه لأنو هيك بيحضروا تريلا شو بدنا فيها وين بدنا ناخدها
سماحة: عم بيقولولي كذا, قلتلن لا, لأنو أنا, إذا ما قدرتو توصلوهن أنا بجيبن مدبرة الطريق على الطريق. ما حدا رح يحس ولا شي بمطرح لا بلبنان ولا بسورية وعلحدود ما وقفت ما وقفت لحظة بقا...
سماحة: بقا شوف خيي شو ناقص فيهن يبلشو يشتغلو.
مخبر: أنا بشوف شو يللي فينا نبلش بيشتغلو فيه.
سماحة: (تلقى مكالمة هاتفية)
مخبر: هلق بدنا ننزل على الموقف بدي اضطر أنا روح.
سماحة: أنت بتروح بتبرم
مخبر: بدي أبرم
سماحة: بنبرم من هون, بتفوت صوب
مخبر: كأني نازل على أ بي سي
سماحة: أول مفرق على اليمين
مخبر: بفوت منو
سماحة: بتوصال لمطرح
مخبر: مين بيفتحلي باب الكراج
سماحة: أنا بكون تحت بفتحلك باب الكراج
مخبر: اوكي
سماحة: بتفوت, منشيل الغراض أنا وياك من سيارتي لسيارتك وحدنا
مخبر: يخزي العين عنك جايبن بسيارتك
سماحة: إيه (إيماءة)
مخبر: شو كان بدك بهالشغلة يطول عمرك
سماحة: يا خيي أولا بدي أمن عالسرية لأنو ما بدي أتأخر وهونيك اللي مهم متل علي بدو هوي يهتم ما يقول لحدا عم يدير كل قصص البلد
مخبر: إيه أنا شامم ريحة هيك
سماحة: عم بيدير كل قصص البلد, يعني ما فيك, بتغيب إنتي ممكن يغيب كل الموضوع . أديش مهم الموضوع مهم اللي عم بيصير بحلب بحمص بالشام. يمكن يغيب عن بالهون إنو والله عندك جهاز وفي حدا يحضرلك الأمور ويحضرلك الواحد إذا عاملها شغلتو ليعطيك ياهن ساعة يللي بتوصال. منشان هيك التأخير
مخبر: سلمتلي عليه وقلتلو إنو بالنسبة يأمنوني بعدين يعني ماديا بس.
سماحة: التأمين المادي والتأمين الشخصي والتأمين هون والتأمين فوق, مأمن.
مخبر: كلو, خلص هلق العلوية على أساس تروح عليهم بالأول
سماحة (إيماءة رفض)
مخبر: ما بتروح عليهم
سمحة: (إيماءة رفض)
مخبر: بس بضل عم جرب أرصد محلات ممكن نعدل نروح عالخطة الأولانية مثلا
سماحة: خلينا عهاو
مخبر: خلينا عهاو, بس المشايخ السنة إذا طلعو بدربنا بدنا نشيلن
سماحة: (إيماءة موافقة) وخصوصا الزعران
مخبر: وخصوصا الزعران
سماحة: يعني علي وعبد العال و...
مخبر: وخالد الضاهر وجماعتو
سماحة (إيماءة موافقة)
مخبر: طيب أنا رح إنزل قبلك.
سماحة: إيه مننزل. أنا رح إنزل لتحت لافتحلك
مخبر: وأنا بنزل عالسيارة
سماحة: بنزل أنا واياك
مخبر: أنا لو عارف, يطول عمرك, خليت الشباب يلاقوني لأعطيهن ياهن هلق صرت بدي تلفن ليجي واحد من هونيك, هلق صرت بدي روح أنا.
سماحة: أنا ما تلفنتلك تما يتسجل أي اتصال بيني وبينك, حتى خليت غلاديس تحكي معك.
مخبر: عرفت أنا هيدا الموضوع أنا فهمت الموضوع على طول... تفضل... الحزب ما معو خبر بالموضوع?
سماحة (عدة إيماءات نفي قاطعة)
مخبر: بنزل قبلك? أنا بدي انزل عالصفر لأبرم.
سماحة: وأنا بكون فتحتلك, ما رح طل بكون فتحتلك.
دخول المخبر وسماحة الى المصعد سويا
حديث داخل المصعد
مخبر: هلق هاو محطوطين بكراتين يطول عمرك
سماحة: إيه إيه
مخبر: بكراتين, هاي أهم شي
سماحة: إيه
مخبر: إيه خلص نشالله يكون باعتين تبع التوقيت الساعات تبع التفجير.
سماحة: هلق بتشوف ما بعرف أنا قلي شو النواقص كتيبة كتبتن.
(إيماءة من سماحة كأنه يحمل قلماً ويدون)
مخبر: تاني شي, أنا كنت بدي إلك مرة الماضية الخط الفرنساوي ما فيني إحكيك عليه? والثاني?
سماحة: لا
مخبر: هيدا الخط التعبان
سماحة: لا هلق بتعطيني خط جديد. أنا بطلبك عليه من خط بيعلم عندك, منصير نحكي عالخط هيدا.
مخبر: خلص ياالله
المخبر في السيارة: نسينا كيس المصاري فوق (قام بالاتصال بمرافق سماحة المدعو فارس) فارس أنا: الكنباية يللي كنت قاعد عليها في كيس نزلي ياه عالباركينغ, لتحت عمول معروف. (انتهاء المكالمة).
نازل لعندو عل الباركينغ جايب المتفجرات معو بالسيارة.
المخبر في السيارة يحاول الاستدلال على الباركينغ من فارس الذي التقى به في الشارع مع وصف لشكل ولون باب الباركينغ.
فارس: فتحو الأستاذ هونيك, إيه عاليمين
مخبر: ما نتبهت أنا. يا الله عذبناه.
فارس: دغري عالشمال
مخبر: بروح هيك, بجي أنا وييه, بدي حط شي بالصندوق.
فارس: انتبه
مخبر: ما تعتل هم البورش مش أغلى من هاي. عم يقلي رجاع خلص.
التقى المخبر وسماحة لوحدهما في الباركينغ وباشرا بتحميل المتفجرات.
سماحة: هاو الصواعق
مخبر: هاو الصواعق
سماحة: هاو القنابل, هاو الساعات.
مخبر: أوكي هيدي الشنتة, خلينا نسكرا بتتسكر?
سماحة: إيه
مخبر: هيدي الشغلة أهم شي
سماحة: هاي الصواعق
مخبر: هاو شو متل الألغام
سماحة: إنتو طالبينن
مخبر: فيك تحمل
سماحة: بحمل
مخبر: حمول يطول عمرك شوي شوي بتأثر الحماوة عليهن أو لا?
سماحة: لا لا ما بيأثر. سألت
مخبر: لأن عندي مسافة طويلة. أنا لازم شيل الساعات حطن جوا. أفضل جوا, وهاي الشنطة شنطة القنابل جوا أحسن.
مخبر: ال تي ان تي هون?
سماحة: إيه
مخبر: خليني ساعدك, ما كانش يفتح الباب معي شوي شوي, شو بعد في بالصندوق هاي الكيس لإلي, يا ويلي خلص فيني أخدن هيك.
سماحة: إيه هوديك حطيطن جوا.
مخبر: بس هيدي زيحا شوي ولا خلص
سماحة: خلص ثابتة
مخبر: طيب أنا حعلملك من رقم منصير نحكي عليه
سماحة:لا عطيني رقمك, عندك ياه?
مخبر: أنا رح علملك ياه, معيش التلفون هون
سماحة: لا علملها لغلاديس
مخبر: بعلملها لغلاديس
سماحة: بتعلملها لغلاديس وأنا بفتحوا
عناق وقبلات بين سماحة وبين المخبر
سماحة: الله يوفقك
مخبر: منواصل بس إلو للمعلم يدير بالو عليي
سماحة: خالصة
مخبر: طيب يالله الرقم بيكون مع غلاديس.
انتهى تفريغ الاجتماعات الثلاثة المذكورة وعليه سطرت لائحة المتفجرات والصواعق واجهزة التحكم والاموال.

المصدر

ليست هناك تعليقات:

إرسال تعليق